2 Esdras 16:1-6

1 vae tibi, Babylon et Asia, vae tibi, Aegypte et Syria.

2 praecingite vos saccos, plangite filios vestros et dolete de his, quia adpropinquavit contritio vestra.

3 inmissus est gladius vobis, et quis est qui avertat eum.

4 inmissus est vobis ignis, et quis est qui extinguat eum.

5 inmissa sunt vobis mala, et quis est qui recutiet ea?

6 numquid recutiet aliquis leonem esurientem in silva aut numquid extinguet ignem, cum stramen incensum fuerit?