Micah 7:7-17

7 ego autem ad Dominum aspiciam expectabo Deum salvatorem meum audiet me Deus meus
8 ne laeteris inimica mea super me quia cecidi consurgam cum sedero in tenebris Dominus lux mea est
9 iram Domini portabo quoniam peccavi ei donec iudicet causam meam et faciat iudicium meum educet me in lucem videbo in iustitiam eius
10 et aspiciet inimica mea et operietur confusione quae dicit ad me ubi est Dominus Deus tuus oculi mei videbunt in eam nunc erit in conculcationem ut lutum platearum
11 dies ut aedificentur maceriae tuae in die illa longe fiet lex
12 in die illa et usque ad te veniet Assur et usque ad civitates munitas et a civitatibus munitis usque ad flumen et ad mare de mari et ad montem de monte
13 et erit terra in desolationem propter habitatores suos et propter fructum cogitationum eorum
14 pasce populum tuum in virga tua gregem hereditatis tuae habitantes solos in saltu in medio Carmeli pascentur Basan et Galaad iuxta dies antiquos
15 secundum dies egressionis tuae de terra Aegypti ostendam ei mirabilia
16 videbunt gentes et confundentur super omni fortitudine sua ponent manus super os aures eorum surdae erunt
17 lingent pulverem sicut serpens velut reptilia terrae proturbabuntur de aedibus suis Dominum Deum nostrum desiderabunt et timebunt te
The Latin Vulgate is in the public domain.