Job 3:1-9

1 post haec aperuit Iob os suum et maledixit diei suo
2 et locutus est
3 pereat dies in qua natus sum et nox in qua dictum est conceptus est homo
4 dies ille vertatur in tenebras non requirat eum Deus desuper et non inlustret lumine
5 obscurent eum tenebrae et umbra mortis occupet eum caligo et involvatur amaritudine
6 noctem illam tenebrosus turbo possideat non conputetur in diebus anni nec numeretur in mensibus
7 sit nox illa solitaria nec laude digna
8 maledicant ei qui maledicunt diei qui parati sunt suscitare Leviathan
9 obtenebrentur stellae caligine eius expectet lucem et non videat nec ortum surgentis aurorae
The Latin Vulgate is in the public domain.