Numbers 25:1-8

1 morabatur autem eo tempore Israhel in Setthim et fornicatus est populus cum filiabus Moab
2 quae vocaverunt eos ad sacrificia sua at illi comederunt et adoraverunt deos earum
3 initiatusque est Israhel Beelphegor et iratus Dominus
4 ait ad Mosen tolle cunctos principes populi et suspende eos contra solem in patibulis ut avertatur furor meus ab Israhel
5 dixitque Moses ad iudices Israhel occidat unusquisque proximos suos qui initiati sunt Beelphegor
6 et ecce unus de filiis Israhel intravit coram fratribus suis ad scortum madianitin vidente Mose et omni turba filiorum Israhel qui flebant ante fores tabernaculi
7 quod cum vidisset Finees filius Eleazari filii Aaron sacerdotis surrexit de medio multitudinis et arrepto pugione
8 ingressus est post virum israhelitem in lupanar et perfodit ambos simul virum scilicet et mulierem in locis genitalibus cessavitque plaga a filiis Israhel
The Latin Vulgate is in the public domain.